БИШКЕК, 1-окт. — Sputnik. Президент Садыр Жапаров бүгүн Карылардын эл аралык күнү менен кыргызстандыктарды куттуктады. Бул тууралуу мамлекет башчынын маалымат кызматы билдирди.
Жапаров кыргыз элинде кылымдардан бери көкүрөгүнө салт-санааны уютуп, келечекти көөдөн менен туюп билген карыларын аздектеп, урматтап келген улуу нарк бар экенин белгилеген.
"Сиздер турмуштун түрдүү даамын татып, ак-караны так ажыратып көзүңүздөр каныгып, оош-кыйыш кыйынчылыктарды бабалардан келе жаткан улуу нарк менен жеңип келдиңиздер. Биз сиздерден улуу наркты улап, андан ары алып кетүүнү үйрөнөбүз. Көптү көрүп көсөм болгон, салтты бузбай, каададан жазбай өмүр улаган өрнөктүү ата-энелердин көрөгөчтүгү, билгичтиги, акылы менен сабыры бизге ар дайым чоң сабак болот", — деди президент.
Ошондой эле ал тарыхый, маданий, руханий баалуулуктарды кылдаттык менен сактап келген улуу муундун өкүлдөрүнө татыктуу жашоо шартын түзүү, алардын коомго активдүү катышуусуна көмөк көрсөтүү негизги милдети экенин айтты.
"Бул багытта быйыл биз пенсияны жана социалдык төлөмдөрдүн көлөмүн кыйла жогорулаттык. Кадырман карыларыбыздын узак жана дөөлөттүү жашоосун камсыз кылууга күч-аракетибизди жумшап жатабыз. "Карыны сыйласаң абийир табасың" деген накыл кеп бар. Биз баарыбыз улгаябыз, карылык ар бирибиздин башыбызда. Карыларыбызга кам көрсөк, ал Кудайдан кайтат. Ардактуу аталар, ак саамайлуу энелер, баарыңыздарга чың ден соолук, узун өмүр каалайм. Төрүбүздүн, элибиздин көркү болуп, Кыргызстан калкына ак батаңыздарды берип жүрө бериңиздер!" — деди Жапаров.
Мамлекет башчы ар бир кыргызстандыктын жүрөгүндө акылы кенч аталарыбызга, мээрими толгон апаларыбызга ыраазы болгон сезим жашай турганын билдирген.