БИШКЕК, 30-сен. — Sputnik. Россиянын президенти Владимир Путин Түркиянын башчысы Режеп Тайип Эрдоган менен сүйлөшүү учурунда "Түндүк агымдагы" кырсыкка баа берип, аны эл аралык террорчулуктун актысы деп атады. Бул тууралуу Кремлдин маалымат кызматына таянып РИА Новости жазды.
"Россиянын президенти "Түндүк агым" жана "Түндүк агым — 2" газ түтүктөрүнө жасалган соккуга, тагыраагы, эл аралык террорчулук актыга принципиалдуу баасын берди. РФ бул маселени БУУнун Коопсуздук кеңешинин ыкчам жыйынында көтөрүп чыгат", — деп жазылат маалыматта.
Эске салсак, Европанын Россияга каршы санкциялары жана Siemens турбиналары оңдоп-түзөөдөн өтүп жаткандыктан "Түндүк агымда" иш августтун аягында токтотулган. Бирок түтүк газ толтурулган боюнча калган. Жакында эле Дания менен Швеция мамлекеттеринин бийликтери "Түндүк агым" жана "Түндүк агым — 2" түтүктөрүнүн төрт жеринен газ чыкканын кабарлашты. Алар эки өлкөнүн тең экономикалык зонасында жайгашкан.
Россия газ түтүгүнө жасалган сокку боюнча кырдаалды адилеттүү жана ар тараптан тыкыр изилдеп чыгууну талап кылууда. Буга чейин Башкы прокуратура "Түндүк агым" газ түтүктөрүнө зыян келтирүү фактысы боюнча эл аралык террорчулук актысына ылайык иш козгоону демилгелеген.
"Түндүк агым" — Балтика деңизинин түбүнөн өткөн Россия менен Германиянын ортосундагы негизги газ куурунун бир бөлүгү.