"Окууну бүтүп жатып дипломдук ишимде "Ромео" аталышындагы оюн фильмин тарттым. Бул чыгарма менин эки жылдык өмүрүмдү алды. Анда менин кичинемде гастролдо жүрүп алган таасирим, сезимдерим берилгени менен окуя, андагы каармандар ойдон чыгарылган. Алайда Кабылан-Көл айылында ташталган театр бар. Ал жерде отургучтар устундан жасалган, кампадай болгон театр. Ал жерде балдар "Ромео жана Жульетта" спектаклин коюп ойношот. Кинодо жаш балдардын сүйүү сезими чагылдырылат. Азыркыга чейин фильм боюнча иштеп жатам. 2023-жылы премьерасы болот. Андан соң "Экспедиция" кыймылынын алкагында Айбек Дайырбековдун көркөм жетекчилигинин астында бир күндүн ичинде футбол талаасын кыялданган камкор уул, чынчыл, эмгекчил, шайыр жана кыялкеч бала тууралуу "Жашыл талаа" аттуу даректүү тасма тарттым. Анын дүйнөлүк премьерасы 2022-жылдын 26-август — 2-сентябрь күндөрү өткөн Москва эл аралык 44-кинофестивалында болду. Аталган сынак — "А" класстагы фестиваль. Бул эмгегимден үмүт артып эч нерсе күткөн эмесмин, күтүүсүз болду. Ал эми картина кыска метраждуу фильмдер сынагына киргизилген. Фестивалдын калыстары кыска мезгилде тартылган чыгармага жакшы пикирлерин айтып, ушул каармандын катышуусунда толук метраждуу фильм тартууну сунушташты", — деди Темиржан уулу.