БИШКЕК, 23-сен. — Sputnik. Кыргызстандын футбол боюнча курама командасынын машыктыруучусу Александр Крестинин Россиянын футболчулары менен болчу оюн алдында маалымат жыйын өткөрдү.
Эске салсак, Бишкек шаарында 24-сентябрда Кыргызстан менен Россиянын топ чеберлеринин беттеши өтөт.
Төмөндө ЖМК өкүлдөрү менен суроо-жооптордун бир катарларына токтолобуз:
Ал Россиянын курама командасы менен болгон биринчи оюн экендигин, аталган өлкө эки жылдан бери матчтарга катышпагандыгын, бул бир топ даярдыкты талап кыларын айтты.
РФтин курама командасынын оюнчуларынын ичинен жашыл майсаңда ким кооптуулук жарата тургандыгы жана башкы машыктыруучусу Валерий Карпин туурасында собол узатышты.
"Ким күчтүү экендигин кантип айта алам?.. Эртең биринчи таймда кимиси, экинчи таймда ким чыгарын билбейбиз да. Бирок Россиянын курама командасын тандоо цикли дурус өттү, Валерий Георгиевичтин клубдагы иши жакшы жүрүп жатат. Андыктан иш (РФтин курама командасында — ред.) ойдогудай жолго коюлуп, алар өз ара жогорку деңгээлде ойноорун түшүнүп турабыз", — деди ал.
Бул оюнга Россиядан да көптөр көз салып турарын, андыктан Кыргызстандын футболчулары РФте ойноого мүмкүнчүлүк жаралар-жаралбасын сурашты.
Крестинин эл аралык оюндар аркылуу агенттерге көп маалымат келип түшөрүн айтты.
"Эгерде кайсы эл аралык оюн болбосун өзүңдү жакшылап көрсөтсөң, карьераңды жакшыртууга болот", — деп кошумчалады.
Кыргызстандын курама командасындагы топ чеберлеринин ичинен Россиянын премьер-лигасында ойной тургандар барбы деген суроого, кайсы бир учурларда мүмкүнчүлүк жаралып калса, андай оюнчулар болорун айтты. Ал эми атын атап бериңиз деген өтүнүчкө, "биринин ысымын атап, экинчисин айтпай койсом, анда аларга болгон мамилем кандай болуп калат?.." деп суроо менен жооп узатты.
Журналисттер машыктыруучунун жеке өзүнө кызыгып, анын бул матч менен россиялык клубдарга көргөзүү ниети бар-жогун билүүгө кызыгышты.
"Кандай гана эл аралык оюндар болбосун команда өзүн атаандаш болуп каршы ойноп жаткан тарапка эле көрсөтпөйт...", — деп жооп узатты.