БИШКЕК, 22-сен. — Sputnik. Өзгөчө кырдаалдар министрлиги гуманитардык жардам берүү, бөлүштүрүү жана башка суроолор боюнча күнү-түнү иштеген 112 номерине чалуу керектигин билдирди.
Кыргыз-тажик чек арасындагы куралдуу кагылыштан жапа чеккен Баткен облусунун калкы үчүн республика боюнча гуманитардык жардамдарды чогултуу пунктулары уюштурулган.
21-сентябрга карата Баткенге ӨКМ тарабынан 131 тонна жардам жөнөтүлгөн. Ошондой эле жарандардын өз күчү менен 732 миң 729 тонна жүк жиберилген. Учурда 188,95 тонна гуманитардык жардам кампада турат.
Республиканын аймактарынан чогултулган гуманитардык жардам 122 оор жүк ташуучу унаага жүктөлүп, Баткен облусунун аймагына жөнөтүлгөн.
Республиканын бардык облустарында жана шаарларында жалпысынан гуманитардык жардамдарды кабыл алган 188 пункт уюштурулган.