БИШКЕК, 22-сен. — Sputnik. Тажикстан тарабынан 14-17-сентябрда болгон кол салуунун кесепетинде талкаланган Баткен облусунун аймагындагы социалдык жана инфраструктуралык объектилерди элчиликтердин жана чет элдик ЖМКлардын өкүлдөрү үчүн өткөрүлгөн пресс-турда көрүп чыгышты.
Алар Тажикстандын аткылоосунун эң көп жабыркаган Лейлек жана Баткен райондорунун Интернационал, Максат, Достук жана Капчыгай айылдарында болушту.
Жергиликтүү тургундар жана мамлекеттик органдардын кызматкерлери болгон окуялар жана Тажикстан тараптан келген куралдуу топтордун мыйзамсыз кадамдары, агрессиясынын кесепети тууралуу айтып беришти.
Талкаланган жана тонолгон турак жайларды, мектептерди, бала бакчаларды, базарларды, административдик жана социалдык объектилерди, милициянын пунктуларын жана башка инфраструктуралык объектилерди көрсөтүштү.
Пресс-турга Франция, Улуу Британия, Түндүк Ирландия Бириккен Королдугу, Украина, Кытай, АКШ, Венгрия, Корея, Иран, Беларусь, Монголия, Пакистан, Катар, Индия, Россия жана Азербайжан мамлекеттеринин аккредитацияланган дипломатиялык өкүлчүлүктөрүнүн жетекчилери жана өкүлдөрү катышты.
Мындан тышкары, пресс-турга Европа биримдиги, Европадагы коопсуздук жана кызматташтык уюму, БУУнун Адам укуктары боюнча Жогорку Комиссарынын башкармалыгы, БУУнун Дүйнөлүк азык-түлүк программасы, Эл аралык Кызыл Крест, Бириккен Улуттар Уюмунун Калкты жайгаштыруу фонду сыяктуу эл аралык уюмдардын өкүлдөрү, ошондой эле Чили, Сан-Марино, Португалия жана Кипрдин ардактуу консулдары катышкан.
Тажикстан тарабынан пландалган куралдуу кол салуунун кесепетинен Кыргызстандын 59 жараны курман болуп, 198 адам ар кандай жаракаттарды алган. 140 миңден ашуун жергиликтүү тургун эвакуацияланган. Ошондой эле 374 турак жай, 171 чарбалык объект, 10 социалдык объект (беш мектеп, эки бала бакча, үч медициналык мекеме), 153 турмуш-тиричиликти камсыздоо объектилери талкаланган жана жабыркаган.