БИШКЕК, 20-сен. — Sputnik. Чек ара кызматынын "Бөрү" атайын даярдыктагы отрядынын жоокери, дайыны билинбей жаткан Жамал Тойчиев аман-эсен табылганын УКМКнын Чек ара кызматы тастыктады.
Аны куралдуу кагылыш учурунда тажик тарап барымтага алган. Социалдык тармактарда алгач анын курман болгону тууралуу жакындарына кабар келгенин, бирок барып сөөгүн таба алышпаганын жазып жатышкан.
Натыйжада ал кечээ, 19-сентябрда, кечинде барымтадан бошотулган төрт аскердин бири болуп чыкты. Тойчиев бутунан жаракат алган.
УКМК төрагасы Камчыбек Ташиев баарынын ден соолугу жакшы экенин, бирөөсүнүн гана бутунда жаракаты болгонун айткан. Алар ооруканага жеткирилип медициналык кароодон өтүп жатат.