НАРЫН, 18-сен. — Sputnik. Бүгүн,18-сентябрда, кыргыз-тажик чек арасындагы куралдуу кагылышууда баатырларча курман болгон чек арачы, улук лейтенант Нурсултан Жаныбеков өзү туулуп-өскөн Оттук айылында акыркы сапарга узатылды.
Узатуу зыйнатында Мекен чегинде эл-жери үчүн окко учкан Нурсултандын эрдиги Нарын облусунун, районунун жетекчилиги, күч түзүмдөрүнүн өкүлдөрү, айылдаштары, туугандары, коллегалары, теңтуштары тарабынан терең кайгыруу менен эскерилди.
Президенттин Нарын облусундагы ыйгарым укуктуу өкүлү Алтынбек Эргешов кыргыз-тажик чек арасындагы куралдуу кагылышууда, тилекке каршы, Теңир-Тоонун төрт эр-азаматы окко учканын, алардын бири Нурсултан экенин терең кайгыруу менен белгилеп, баатыр уулду тарбиялап өстүргөн ата-энесине, туугандарына, эли-журтуна сабыр тиледи.
"Нурсултан эр жеткенден баштап чек арада кызмат кылды. Кыргыздын бир чарчы метр жерин душмандарга тебелетпей, мекен алдындагы ыйык милдетин аткарып жатып мекен чегинде окко учту. Гүлгүндөй курагында шейит болгон эр азаматтарыбызга кабыргабыз кайышып, жүрөгүбүз сыздап турат... Алардын жасаган эрдиги жана жаркын элеси кыргыз элинин, теңир-тоолуктардын жүрөгүндө түбөлүккө сакталып калат...", — деди облус жетекчиси.
Нурсултан тууралуу маалымат
Нурсултан Жаныбеков 1995-жылдын 25-июлунда Нарын районунун Оттук айылында жарык дүйнөгө келген.
2011-жылы Нарын шаарындагы №7 М.Сыдыков атындагы орто мектептин 9-классын ийгиликтүү аяктап, Агрардык-экономикалык колледжге тапшырган.
2014-жылдын 9-апрелинде Ош облусундагы №92843 аскер бөлүгүнө мөөнөттүү аскердик кызматка чакырылган.
2015-жылдын 7-апрелинде мөөнөттүү кызматын аяктап, ошол эле жылдын декабрь айында Мамлекеттик чек ара кызматынын №2025 аскердик бөлүгүнө аскердик кызматка кирген.
Кызмат учурунда "Көк-Айгыр" чек ара кызматынын улук аткычы, "Көк-Айгыр" чек ара кызмат бөлүмүнүн улук кавалерист-улук аткычы, "Бөрү" атайын даярдалган отрядынын улук чалгынчы-улук көзгө атары болуп эмгектенген.
2022-жылдын 23-мартында 2054 аскер бөлүгүнүн 6-атайын багыттагы тобунун улук чалгынчы-улук аткычы кызматына дайындалып, Баткен облусундагы Раззаков шаарына кызмат өтөө үчүн жиберилген.
Сержант Нурсултан Жаныбековдун мекенине кылган кызматы бааланып, Президенттин Ардак грамотасы жана бир катар ведомстволук сыйлык, медалдар менен сыйланган.
Үй-бүлөдө 4 бир туугандын улуусу болчу.
2022-жылдын 14-сентябрында кыргыз-тажик чек арасында жаңжал башталып, Тажикстан аскерлери баскынчылык менен кирип келген. Бардык чек ара тилкелеринде атышуу башталган. Бул жаңжалдан 36 адам көз жумду. Алардын ичинде арбыны — жоокерлер.