БИШКЕК, 16-сен. — Sputnik. Дүйнөлүк саясат менен экономикада фундаменталдык трансформация байкалууда, ал процесстер кайталангыс жагдайды шарттайт. Бул тууралуу Россиянын президенти Владимир Путин билдирди.
Ал Шанхай кызматташтык уюмунун саммитинде сүйлөп, ШКУнун кадыр-баркы дүйнөлүк деңгээлде өсүп жатканын айтты.
"Чындыгында ШКУ бүгүнкү күндө дүйнөдөгү эң ири аймактык уюм. Бул аймакта планетанын жарымынан көп калкы жашайт, дүйнөлүк дүң продукциянын төрттөн бир бөлүгүн түзөт. Шанхай кызматташтык уюму муну менен гана токтоп калбастан акырындык менен өнүгүп, аймактык жана эл аралык маселелерди чечүүдө. Евразия чөлкөмүндө тынчтык, туруктуулукту орнотууда өз ролун арттырууда", — деди Путин.
РФ президенти ушундай учурдагы оңой эмес абалда уюмдун маанилүүлүгү жогору экенин белгилеген.
"Дүйнөлүк саясат менен экономикада фундаменталдык трансформация байкалууда, ал процесстер кайталангыс жагдайды шарттайт. Азыр күндөн-күнгө жаңы күчтөрдүн борборлору аныкталып, алар БУУнун жалпы принциптери, эл аралык укуктун талаптары, уставынын негизинде кызматташууда", — деди Путин.
Ал, мындан сырткары, бул принциптердин аркасында ШКУга мүчө мамлекеттер маданий-гуманитардык, экономика, саясий багыттар боюнча жигердүү кызматташууда деген пикирин кошумчалады.