КМШ өлкөлөрүнүн музыкалык театрлар ассоциациясынын директору Наталья Зыкова менен болгон жолугушууда Кыргыз улуттук опера жана балет театрына 60тан ашык чыгармачыл коллективди бириктирген ассоциацияга кирүүгө сунуш түштү. Азыр документтер даярдалып жатканын, бул Москвада өтө турган музыкалык театрлардын фестивалына катышууга мүмкүндүк берерин Алмаз Истамбаев Sputnik Кыргызстан радиосунун эфиринде маек куруп жатып билдирди.
Анын айтымында, фестивалдын алкагында Кыргызстан Россиянын Мамлекеттик академиялык чоң театры, Станиславский жана Немирович-Данченко атындагы Москва академиялык музыкалык театры, Н.И. Сац атындагы мамлекеттик академиялык балдар музыкалык театры жана "Геликон-Опера" музыкалык театры сыяктуу төрт ири аянтчада "Айчүрөк" операсын жана "Чолпон" балетин көрсөтүүнү пландаштырып жатат.
"Россияга барып Москвадагы Станиславский жана Немирович-Данченко атындагы академиялык музыкалык театрдын башкы директору Андрей Борисов менен жолугуп, чыгармачылык коллектив менен театрдын жетекчилерин стажировкадан өткөрүү, артисттерди костюмдар жана бут кийимдер менен камсыздоо жаатында макулдаштык. Андан тышкары, Санкт-Петербургда Туман Жумабаевди эскерүү көргөзмөсүнө бардым. Консулдук жана кыргыз диаспорасы көрүнүктүү сүрөтчүнүн ушундай эле иш-чарасын мекенинде өткөрүүгө көмөктөшүүгө ниеттенүүдө. Москвадагы "Геликон-Опера" театрынын негиздөөчүсү, РФ эл артисти Дмитрий Бертман менен жолуктум. Кыргыз операсынын коллективи аталган театрда стажировкадан өтүү мүмкүнчүлүгүнө ээ болушту. Дмитрий Бертман биздин театрдын 80 жылдык мааракесине белек катары өзүнүн режиссурасы жана декорациясы менен заманбап спектакль коюуга убада берди. Ошондой эле Калининград музыкалык театрынын башкы директору, РФ маданиятына эмгек сиңирген ишмер Валерий Лысенко, BALTIC+ медиахолдингинин негиздөөчүсү жана жетекчиси Анатолий Стародворский менен жолугуп, күзүндө Калининград музыкалык театры Бишкекке балдар спектаклин жана "Алые парусы" мюзиклин алып келип, келерки жылы биздин театрдын сахнасында "Снегурочка" операсын коюуну пландап жатышат. Чайковский атындагы Москва мамлекеттик консерваториясынын алдындагы Борбордук музыкалык окуу жайынын "Балтика" филиалынын директору менен жолугуп, кызматташуу жаатында баарлаштык", — деди Истамбаев.
Ал иш сапарында Абдылас Малдыбаев атындагы Опера жана балет театрынын артисттерин Россиянын мыкты театрларында стажировкадан өткөрүү жана квалификациясын жогорулатуу маселеси көбүрөөк талкууланганын, келишимдин алкагында Кыргызстанга белгилүү мугалимдер жана репетиторлор чакырыларын кошумчалады.