БИШКЕК, 9-сен. — Sputnik. Мамлекет башчы Садыр Жапаров бүгүн, 9-сентябрда, кыргызстандыктарды Комуз күнү менен куттуктады. Бул тууралуу президенттин маалымат кызматы кабарлады.
Өлкө башчы комуз улуттук маданияттын сыймыгы, элдик өнөрдүн башаты экенин белгилеп, илгертен кыргыздын эрмеги — комуз, арманы — күү болгонуна токтолгон.
"Комуз — адамдын ички дүйнөсүн, ой-толгоосун түшүндүрө алган жандуу аспап. Сыздаган добушунда элибиздин кубанычы менен кайгысы, ар-намысы менен абийири, тарыхы менен таржымалы баяндалат. Сыдырым тоонун желиндей бирде шар, бирде мукам кайрыктарды камтыган "Камбаркан", "Сынган бугу", "Маш ботой", "Эргиме", "Саадак какты", "Ак бугу" жана башка керемет күүлөр азыр да кыргыздын канын толкутуп, сезимин козгоп турат. Залкар комузчулар Ниязалы, Айдараалы, Карамолдо, Токтогул, Мураталы, Ыбырай, Атай, Шекербек жана башкалар не бир түркүн ойлорду, сезимдерди камтыган татаал кайрыктуу, мукам абаздуу күүлөрдү жан дүйнөнү байыткан руханий азык кылып калтырышты. Заманыбызга жараша комуз күүлөрү жаӊыча жаӊырып, жаңыча ойноо ыкмалары, ыргактары менен толукталып барат. Кийинки эле Асанбек Кыдырназаровдун "Кыргыз көчү", Нурак Абдрахмановдун "Соӊ-Көл баяны", "Сары-Өзөн баяны", Руслан Жумабаевдин "Эрке Сары" күүлөрү уккан элдин кумарын кандырып, черин жазып, жамы кыргыз журтчулугуна тереӊ сиӊип кетти", — деп жазылат президенттин куттуктоосунда.
Ал кыргыздын улуу мурасы болгон комуз дүйнөсүн урматтап, аздектеп, урпактарга өткөрүп берүү ар бир кыргыз жаранынын милдети экенин белгилеген. Ошондой эле Комуз күнү жакшы жөрөлгөгө айланып, мындан ары өлкөнүн маданий турмушунда өзүнүн татыктуу ордун табат деген ишеничин билдирген.