БИШКЕК, 9-сен. — Sputnik. Жогорку Кеңештин депутаттары өз фондуна каралган каражатты эки эсе көбөйтүү жана маянасын жогорулатуу чечимин кабыл алды. Бул тууралуу Sputnik Кыргызстандын кабарчысына парламенттеги ишенимдүү адамдар билдирди.
Учурда региондорго барууга транспорт чыгымы, кагаз-калем алуу сыяктуу муктаждыктарына деп ар бир депутаттын фондуна 40 миң сомдон берилет. Эми аны 80 миң сомго көтөрүү чечими кабыл алынды. Эл өкүлдөрү маяналарын дагы жогорулатууну чечишкен, бирок суммасы азырынча белгисиз.
Белгилей кетсек, шаршемби күнү депутаттар кызматтык колдонуудагы купуя документтер келип түшкөнүн айтып, жабык эшик артында жыйын өткөргөн болчу. Аталган маселелер ошондо каралып, регламентке киргизүү боюнча токтом кабыл алынганы айтылды.
Маалыматты эл өкүлү Дастан Бекешев тастыктап, азыркы фонд муктаждыктарга жетпей жатканын белгиледи.
© Фото / пресс-служба Жогорку Кенеша
"Бизге шайлоочулар тигини-муну кылып бер деп өтө көп кайрылышат. Бирок, ишенесизби, бизде бир дагы бюджет жок, фонд эле бар. Мисалы, шаардык кеңештин депутаттарына бир жылга 4 миллион сом берилет. Аны эч ким билбейт. Мисалы, мен коомдук кабылдамамды өзүм ремонт кылдым. Ал жерге коомдук жардамчы алып отургузайын деп жатам. Эми 10 миң сом берсең эч ким келбейт да. Бул маяна эмес, ар кандай чыгымдарга берилет. Мисалы, Оштон шайланган депутаттар шайлоочулары менен жолукса авиабилет алганга, бензинине деп каралган. Ал эми айлык акыны жогорулатуу тууралуу билбейт экенмин", — деди Бекешев.
Ал эми депутат Эмил Токтошев жабык эшик артында өткөн жыйынга катышпаганын, бирок кесиптештеринен угуп жатканын билдирди.
Белгилей кетсек, учурда ЖК төрагасы 30 миң, орун басарлары 27 миң, фракция лидерлери менен тармактык комитеттин төрагалары 26 миң, депутаттар 25 миң сом маяна (оклад) алат. Иш тажрыйбасына, класстык чинине карап дагы кошумча төлөнөт.
Президенттин жарлыгынан кийин ЖК депутаттарынын маянасы канчага кыскарат
© Фото / Даниил Сулайманов
Өткөн жылдын 2-декабрында президент Садыр Жапаров эл өкүлдөрүнүн маянасын азайтуу боюнча жарлык чыгарганы маалымдалган. Кийинчерээк 500 сомго гана азайганы белгилүү болгон.