БИШКЕК, 2-сен. — Sputnik. Айыл чарба министри Аскарбек Жаныбеков Sputnik Кыргызстан агенттигине маек берип жатып, өлкө керектүү азык-түлүк менен канчалык деңгээлде камсыз болгонун айтып, дефицит жаралбайбы деген суроолорго жооп берди.
Аткаминер быйыл кыргыз фермерлери дан боюнча керектөөнүн 65-68 пайызы менен камсыз кыларын айтып, калганы Россия, Казакстандан алып келинерин белгиледи.
"Кумшекер быйылкы жылга жетет. Үчүнчү мамлекеттерден бул азыкты салыгы жок алып кирүүгө квота алып, Кыргызстанга 105 миң тоннага жакын кумшекер жеткирилген. Азыр биз чек араларды экспортко аз-аздан ачуу боюнча чечим кабыл алууга аргасыз болуп жатабыз. 1-октябрда өзүбүздүн кызылча жыйналып башталат. Бул учурда фермер, кайра иштеткендердин эмгегин да эске алышыбыз керек", — деди министр.
Ал быйыл да, кийинки жылдын биринчи жарымында да кумшекер тартыш болбой турганын айтып, өсүмдүк майы боюнча да суроого жооп берди.
"Жылына 62 миң тонна өсүмдүк майы керек. Өзүбүздө өндүрүлгөн май менен 20 пайыз гана камсыз кыла алабыз. Бул маселени чечүү үчүн быйыл жаңы өндүрүштөр ачылды. Болгону азыр бизге кайра иштетүүгө сырьё жетишсиз болууда", — деген ал.
Министр бул жылы Кыргызстанга күн караманын, эспарцеттин жана соянын үрөндөрү ири көлөмдө алып келингенин кошумчалаган.