БИШКЕК, 31-авг. — Sputnik. Мамлекет башчы Садыр Жапаров кыргызстандыктарды өлкөнүн көз карандысыздыгынын 31 жылдыгы, Эгемендүүлүк күнү менен куттуктаганын президенттин маалымат кызматы билдирди.
Өлкө башчы кыргыз эли улуттук руху менен күчтүү экенин айтып, ириде тарыхы бай, эне тили көркөм, деми күчтүү, нарк билги, эркиндикти туу туткан эгемендүү эл экенин белгилеген.
"Биздин эң башкы байлыгыбыз – эгемен мамлекетибиз, эгемен элибиз. Мындан өткөн байлык да, бакыт да жок! Быйыл эгемендүүлүктүн 31 жылдыгын берекелүү Сары-Өзөн – Чүй өрөөнүндөгү кереметтүү Чуңкурчак жайлоосунда салтанаттуу белгилеп, 31 метрлик туубузду тоо башына көкөлөтүп жатабыз. Кызыл туубуз кылымдарды карыткан тарыхта дагы, азыркы жашап жаткан заманыбызда дагы биримдиктин, ынтымактын тиреги болуп келди. Кыргызда ар дайым ийгиликке, жеңишке жеткенде туусун бийик көтөрүп, ага таазим кылып келген. Байрагыбыз бийик желбиреп турса, элибиздин мекенге болгон сүйүү жана атуулдук сезими артат. Себеби атуулдук ариетибиз да, ар намысыбыз да кызыл туубуз менен бир катарда турат", — деген Жапаров.
Ал мындан кийин Эгемендүүлүк майрамын ар жылы ар бир дубанда чоң салтанат менен өткөрүүнү салтка айлантуу ниети бар экенин белгилеген.
"Мындай кадам өлкөнүн бардык аймактарында жашаган элибиздин ынтымагын арттырат, биримдигин бекемдейт, карым-катнашын күчөтөт. Албетте, 3 000 жылдан ашкан тарыхыбызда 31 жыл бир көз ирмемдей эле мезгил. Узак тарыхыбызда кээде жылдызыбыз жанып, улуу каганат куруп көккө сермелдик. Кээде эркиндигибизди алдырып, чачырап кете жаздаган, азып-тозгон абалды башыбыздан кечирдик. Айтор, тарыхтын эчендеген сыноолоруна кабылдык. Ошентсе да карт тарыхта кыргыз менен үзөңгүлөш жашаган далай эл бүгүн жок, алардын аталыштары гана тарых беттеринде калды. Көкүрөгүбүзгө сыймык уялап турган ушул күнү Кыргызстандын эркиндигин эңсеп-тилеп, ал үчүн жан аянбай тынымсыз күрөшүп келген ата-бабаларыбыздын эрдигин жана элесин эстен чыгарбайбыз. Эл-жердин көз карандысыздыгы үчүн канын, жанын аябай күрөшкөн Байтик баатыр сыяктуу бабаларыбызды эскерүү, алардын Ата Журтка кылган кызматын кийинки муундарга чыпчыргасын коротпой жеткирүү мойнубуздагы ыйык парзыбыз", — деп жазылат президенттин куттуктоосунда.
Белгилей кетсек, майрамга карата Чуңкурчак жайлоосунда бийиктиги 31 метр болгон желек орнотулду.