ЧОЛПОНА-АТА, 25-авг. — Sputnik. Евразия экономикалык комиссиясынын төрагасы Михаил Мясникович ЕАЭБ жана КМШ өлкөлөрүнө Жаштардын демилгелерин колдоо үчүн евразиялык фонд түзүүнү сунуштады.
Ал бүгүн ЕАЭБ жана КМШ өлкөлөрүнүн биринчи Жаштар форумунун ачылышында сүйлөгөн.
"Жаштардын демилгелерин колдой турган Евразия фондун негиздөө максатка ылайык деп эсептейм. Бул сунушту Россиянын Өнөр жай жана ишкерлер союзу, ошондой эле Беларустун Өнөр жай жана ишкерлер конфедерациясы колдоду. Фонд регионалдык өкүлчүлүктөрүн ачып жаштарга консультативдик, билим берүү жана башка кызматтарын акысыз көрсөтүп турмак. Жаштардын стартаптарын колдоо үчүн каржы булагы түзүлмөк", — деди Мясникович.
ЕЭК төрагасы микроэлектроника, заманбап компьютердик технологиялар, биотехнологиялар боюнча долбоорлор биринчи кезекте колдоого алынмактыгын белгиледи.
Бүгүн Чолпон-Ата шаарындагы "Рух-Ордо" маданий борборунда ЕАЭБ жана КМШ өлкөлөрүнүн "Келечек" деп аталган биринчи Жаштар форуму өтүп жатат. Ага Армения, Беларусь, Казакстан, Кыргызстан, Россия жана Өзбекстандан 250дөн ашуун делегат катышууда. Жаш ишкерлер, мамлекеттик кызматкерлер, дипломаттар, креативдүү жаштар жана студенттер кызматташтыкты андан ары өнүктүрүү жана Евразия интеграциясын жайылтуу идеяларын талкуулашат.
Иш-чара Евразия өкмөттөр аралык кеңешинин жыйыны менен катарлаш өтүүдө. Биринчи Жаштар форуму Кыргызстандын президенти Садыр Жапаров тарабынан демилгеленген.
Sputnik Кыргызстан маалымат агенттиги жана радиосу форумдун расмий медиаөнөктөшү болду.