БИШКЕК, 23-авг. — Sputnik. Коммерциялык банктарга алтын менен күмүш куймаларын сатып алуу жана сатуу укугун берүү маселеси каралууда. Бул тууралуу өкмөттүн маалымат кызматы кабарлады.
Билдирүүгө караганда, бул маселени министрлер кабинетинин төрагасы Акылбек Жапаров банк секторунун өкүлдөрү менен кеңешме учурунда талкуулаган.
"Банктарга алтын, күмүш куймалар жана монета түрүндө сатууга, сатып алуу укук берүү мүмкүнчүлүгү каралат. Бул валюталык тобокелдиктерди диверсификациялоо механизмдеринин бири болуп калат", — деп айтылат билдирүүдө.
Ошондой эле кеңешмеде ар кандай долбоорлорду ишке ашыруу, мисалы, чакан ГЭСтерди куруу үчүн ресурстарды пайдалана турган банктардын консорциумун түзүү боюнча сөз болду.
Мындан тышкары, еврооблигациялар рыногуна чыгуу пландаштырылууда. Башкача айтканда, Кыргызстандын коммерциялык банктары баалуу кагаздарын эл аралык фондулук биржаларга жайгаштыруу мүмкүнчүлүгүнө ээ болмокчу.
Эске салсак, жылдын башында президент Садыр Жапаров кыргызстандыктарды эгерде акчасы болсо, аны бош койбой алтын алып коюуга чакырган. Учурда Кыргызстандын Улуттук банкы 1, 2, 5, 10, 31,1 (унция) жана 100 грамм салмактагы алтын куймаларын сатып жатат. 23-августка карата алтындын 1 граммы 6 380,50 сомдон сатып алынып, 7 165 сомдон сатылууда.