"Кыргызстандан барган эмгек мигранттары Россияда абдан эле көп. Алар негизинен юридикалык консультация алуу, жаңы чыккан эрежелер же мыйзамдардын өзгөрүшү боюнча маалыматка ээ болуу максатында элчиликке барышат. Москвадагы кыргыз элчилигинин астында мунун айынан дайыма топтолгон адамдарды көрүүгө болот. Маселени кароолчулукка юристти коюу менен жана кеңсенин ичинде элди тейлеген юристтердин санын көбөйтүү менен да чечсе болот. Бирок бул деле толугу менен элчиликтин ишин жеңилдетпейт. Андыктан акча төлөп кызмат алуучу жеке менчик калкты тейлөөчү борборлорду уюштуруу зарыл. Ал жерде юридикалык кеп-кеңеш алуу акысыз, ал эми тигил же бул кагаз иштерин бүткөрүү, мекен аркылуу документтерин иреттөө жана башка убакыт менен эмгекти талап кылган иштерге көп эмес акы төлөнө турган негизде иштеши керек. Мындай бир борбордун күнүнө 400-450 адамды тейлөөгө кудурети жетет. Ичинде төрт юрист болот. Алардын экөө калкка онлайн жооп берип отурса, калган экөө кыдырып, маселени жеринде чечет. Кыргызстан тарап болгону бир вице-консулду ушул борборлор менен иштөөгө бекитип берсе жетишет. Аталган мекемелер элчиликке башка жүгүн артпайт. Менин бул сунушумду Россияда жашаган кыргыз ишкерлер деле аткара алмак. Жыйынтыгында элди ыкчам, сапаттуу тейлөө менен камсыздап, элчилик бул маселеден арылып, эл аралык мамиледеги башка иштерин жүргүзө бермек", — деди Эшимов.