БИШКЕК, 19-авг. — Sputnik. "Кепилдик фонду" ишканасы кыргызстандыктарга мамлекеттик ипотека боюнча баштапкы төлөмүн төлөөгө жардам берет.
Ведомство президент Садыр Жапаров "КР Кепилдик фонду жөнүндө" мыйзамга өзгөртүү киргизүү тууралуу мыйзамды кабыл алганын белгиледи. Ал 27-августта күчүнө кирет.
Өзгөртүүгө ылайык, ипотекалык кредит мамлекеттик программасынын катышуучуларынын баштапкы төлөмгө каражаты жок болсо, фонддон кепилдик ала алышат. Банктар фонддун кепилдиги менен жарандарга ипотекалык кредит бере берет. Азыркы учурда турак жай алууда баасынын 10дон 30 пайызга чейинки бөлүгү баштапкы төлөм катары талап кылынат.
Ошондой эле "кепилдик портфели" деген жаңы продукт киргизилди. Банктар "Кепилдик фондунун" кепилдик портфели менен эле кредит бере берет. Ал банктарга кредиттик тобокелчиликтерди азайтат, насыя алуу табыштамасын кароо мөөнөтүн жана документтердин санын кыскартат, ошондой эле кредит берүү процедурасын жөнөкөйлөштүрөт.
Фонд мыйзамдын өзгөртүлүшү кредит берүүлөрдүн көбөйүшүнө, ишкерлерге кепилдикти камсыздоого өбөлгө болуп, алардын өнүгүшүнө жана жумушчу орундардын көбөйүшүнө шарт түзөрүнө ишеним артат.