БИШКЕК, 17-авг. — Sputnik. Кыргызстандык танкачылар "Танк биатлону — 2022" жарышынын экинчи этабында өз күчүн сынады. Ата мекендик аскерлер өз тобунда Россия, Кытай, Беларусь командалары менен ат салышты.
Мамлекеттин атынан танк командири, лейтенант Азамат Жолдошбеков, аткыч-оператор, кенже сержант Жанболот Эралиев, механик-айдоочу, сержант Азиз Гапуржанов намыс талашты.
Катышуучуларга үч түрдүү бутаны таамай атуу талабы коюлган, эгер аткан огу тийбей калса айып иретинде айлампаны бир-эки ирет айланып чыгат. Кыргызстан беш бутанын үчөөнү так тийгизе алды, экөөнө огу тийбей калганы үчүн айып берилди. Мындан улам финишке жетүү убактысы узарып кетти.
Жарыштын жыйынтыгы төмөнкүдөй болду:
Россия — 22:12 минута;
Кытай — 24:48 минута;
Беларусь — 27:58 минута;
Кыргызстан — 44:43 минута.
Биринчи дивизиондо 10 команда бар. 21-августта жарыштын үчүнчү этабы өтөт. Бардык оюндан алган упайлар чогултулуп, жыйынтыгында сегиз команда жарым финалга чыгат. Азырынча Кыргызстан тогузунчу орунда турат.