БИШКЕК, 25-июл. — Sputnik. Мектеп жетекчилиги, мугалимдер окуучуларга окшош форма кийгиле деп мажбурлаганга укугу жок. Башкысы, мектеп формасы классикалык стилде болушу керек. Бул тууралуу билим берүү жана илим министринин орун басары Надира Жусупбекова брифинг учурунда билдирди.
Министрдин орун басары окуучулар быйыл 2015-жылы бекитилген токтомго ылайык кийине турганын белгилеген.
"Токтомдо мектеп окуучулары классикалык стилде кийиниши керек деп жазылып турат. Анын ичинде мектеп формасынын бир нече түсү көрсөтүлгөн. Ак көйнөк же кофта, кара шым, юбка да классикалык стилге кирет. Айтор, ата-энелер базар же дүкөнгө барганда классикалык түрдөгү бардык кийимди балдарына алып бере алышат. Болгону окуучу мектепке спорттук же башка стилде кийинип келбеши керек. Мындан тышкары, бир дагы мектеп ата-эне, окуучуларга "мындай түстөгү мектеп формасын кийгиле" деп таңуулаганга укугу жок. Эң башкысы, классикалык стилде болушу шарт", — деген Жусупбекова.
Министрдин орун басары бирдиктүү, башкача айтканда, окшош мектеп формасы боюнча быйыл жаңы чечимдер кабыл алына турганын кошумчалады.