БИШКЕК, 13-авг. — Sputnik. Республикалык психикалык ден соолук борборунун врач-психиатры Айгерим Төлөбекова уйку параличинин себептерин түшүндүрдү.
Анын айтымында, статистика боюнча адамдардын 40-50 пайызы өмүрүндө бир жолу уйку параличине кабылат. Ал эми дайыма кайталанып турган уйку параличи дүйнө жүзү боюнча болгону 7 же 6 пайызды түзөт.
"Мындай абалга студенттер көп кабылат экен. Бул адамдын стресске кабылышы жана уктоо нормасынын бузулушу менен түшүндүрүлөт. Муну менен катар кичине кезинде стресске кабылса да уйку-соонун ортосундагы галлюцинация коштой берет. Себеби ошол психологиялык жараат сезимдин түпкүрүндө (подсознание) калып, аң-сезимге кайтып келе албаганы менен улам-улам белги бере берет. Ошону менен адам уйку параличинен жабыркайт же түндө чочуйт. Адам алгач эмнеден улам мындай абалга тушугуп жатканын анализдеп, себебин иликтеп көрүшү керек", — деген адис.
Психиатр туура эмес жатып калуу да уйку параличинин бир себеби экенин белгилеген.
"Медицинада да, исламда да оң капталың менен жаткан туура делет. Анткени ошол убакта кабырганын арасындагы булчуңдар толук ачылып кычкылтек жетишерлик болуп, өпкө жакшы дем алат. Кан тамырлар кысылганда жүрөк да кыйналып, күч келет. Ошол учурда организм мээге "ойгон" деп жан талашып коркунуч сигналын жибере баштайт", — деген ал.
Төлөбекова уйку параличи кармаган убакта адам коркпой өзүн-өзү кармашы керектигин айтып, дене бойду бош коюп, көңүлдү башкага бурганга аракет жасаса тез өтүп кетерин эскерткен.
Медиктин уйку параличи жана албарсты тууралуу маегин толугу менен Sputnik Кыргызстан агенттигинен окуй аласыздар.