БИШКЕК, 11-авг. — Sputnik. 11-12-августта күтүлүп жаткан нөшөрлүү жаан-чачынга байланыштуу республиканын тоо этектеринде жана тоолуу райондорунда сел жүрүшү мүмкүн. Бул тууралуу ӨКМдин маалымат кызматы кабарлады.
Билдирмеге караганда, бүгүн Ысык-Көл облусунун көпчүлүк аймактарында, Чүй, Талас, Баткен, Нарын облустарынын кээ бир райондорунда жана Ош, Жалал-Абад облустарынын тоолуу райондорунда өткүн өтүшү ыктымал.
Батыштан соккон шамалдын ылдамдыгы секундасына 4-9 метрден, күндүз кээ бир райондордо 15-20 метрге жетиши күтүлүүдө.
Абанын температурасы Чүй облусунда 26…31, Таласта 24…29 жылуу болсо, Баткен, Ош, Жалал-Абад облустарында 30…35 градус ысык болот. Ал эми Нарын менен Ысык-Көлдө күндүн табы 24…29 градуска жетиши божомолонуп жатат.
Бишкекте түштөн кийин өткүн өтүшү ыктымал.