БИШКЕК, 10-авг. — Sputnik. Шаршемби күнү Кытайдын Элдик боштондук армиясынын Чыгыш командачылыгы Тайванга жакын жердеги аскердик машыгуулардын алкагында коюлган милдеттер ийгиликтүү аткарылганын жарыялады. Бул тууралуу командачылыктын WeChat социалдык тармагынын расмий аккаунтундагы билдирүүсүнө таянып РИА Новости жазды.
"Тайвандын тегерегиндеги аскердик иш-чаралардын алкагындагы бардык тапшырмалар ийгиликтүү аткарылды. Бирок Тайвань кысыгындагы ар бир өзгөрүүнү көзөмөлдөп туруу үчүн машыгулар улана берет. Мунун бардыгы мамлекеттин эгемендүүлүгүн жана аймактык бүтүндүгүн коргоо үчүн жасалып жатат", — деп айтылат билдирүүдө.
Тайвандын айланасындагы машыгуу
Өткөн жуманын башында АКШ Конгрессинин Өкүлдөр палатасынын спикери Нэнси Пелоси Кытай тараптын каршы болгонуна карабай Тайванга барган. Ал 25 жыл ичинде аралга келген эң жогорку даражалуу америкалык аткаминер болуп калды.
Натыйжада бейшембиде Кытай армиясы Тайвандын айланасында ири масштабдуу аскердик машыгууларды баштаган. Анда AH-64E Apache тик учактары колдонулду.
4-7-августтагы машыгуулардан тышкары, Пекин Тайвандын эки фондуна, Пелосинин өзүнө жана анын үй-бүлөсүнө санкция киргизди. Вашингтон менен климаттын өзгөрүшү боюнча сүйлөшүүлөрдү жана башка кызматташтыкты токтотту.
Ошондой эле Тайванга табигый кумду экспорттоого жана аралдан цитрус жемиштерин, балыктын кээ бир түрлөрүн импорттоого тыюу салды. Кытай бийлиги америкалык аткаминердин сапарынын бардык кесепеттери али алдыда экенин жана алар үчүн жоопкерчиликти Вашингтон менен Тайбэй тарта турганын билдирген.