БИШКЕК, 10-авг. — Sputnik. Кыргызстандан тышкары жүргөн 2 306 жаран айдоочулук күбөлүктөрдү алмаштыруу маселеси боюнча дипломатиялык мекемелерге кайрылып, анын ичинен 1 881ине айдоочулук күбөлүк берилди. Бул тууралуу ИИМдин "Унаа" мекемесинин маалымат кызматы кабарлады.
Мамлекеттик мекеме ушул жылдын 17-январынан тартып Кыргызстандын чет өлкөдөгү жайларында улуттук үлгүдөгү айдоочулук күбөлүктөрдү алмаштыруу процедурасы башталганын эске салды.
"Аталган документти калыбына келтирип же алмаштырам деген Кыргызстандын бардык жарандары жашаган жери боюнча дипломатиялык өкүлчүлүктөргө кайрылса болот", — деп жазылат маалыматта.
Айдоочулук күбөлүктү алмаштырууга керек болгон документтер:
идентификациялык жеке номер;
белгилеген форма боюнча арыз (ошол жерде толтурулат);
паспорт же жалпы жарандык паспорт;
консулдук легалдаштыруу жөнүндө белги коюлган, мамлекеттик же расмий тилге нотариалдык күбөлөндүрүлгөн, чет мамлекеттин ыйгарым укуктуу медициналык мекемесинен (наркологиялык текшерүү, психикалык саламаттыгын аныктоо, көрүүсүн текшерүү) өткөндүгүн ырастаган документ;
улуттук жана эл аралык айдоочулук күбөлүк (жоголгон учурда берилбейт);
айдоочуларды даярдоо боюнча курстардан өткөндүгү тууралуу күбөлүк;
айдоочулардын курамын даярдаган окутуучу уюмдар тарабынан берилген айдоочунун өздүк карточкасы;
6-7-пунктуларда көрсөтүлгөн документтер тапшырылбаган учурда "Унаа" мамлекеттик мекемеси аларды маалыматтык базага киргизүү боюнча тийиштүү процедураларды өз алдынча жүргүзөрү кошумчаланды.
"Бардык салык жана банктардын комиссияларын эсепке алганда айдоочулук күбөлүктүн наркы 561 сомду түзөт", — деп жазылат билдирмеде.
"Унаа" мекемеси айдоочулук күбөлүктөрдү алмаштырып берем деген бейтааныш адамдардан алыс болуп, түздөн-түз дипломатиялык өкүлчүлүктөргө кайрылып, документти расмий жол менен алууга чакырды.