БИШКЕК, 3-авг. — Sputnik. Тайвань аскерий коркунучтардан жалтактап артка чегинбейт. Бул тууралуу аралдын администрациясынын башчысы Цай Инвэнь АКШ Конгрессинин Өкүлдөр палатасынын спикери Нэнси Пелоси менен жолугушуу учурунда айтканын РИА Новости жазды.
"Аскердик коркунучтарга туш болгон Тайвань артка чегинбейт, биз улуттук эгемендүүлүгүбүздү бекем сактайбыз жана демократияны коргоону улантабыз", — деди Цай Инвэнь.
Андан соң жетекчи Нэнси Пелосиге Вашингтон — Тайбэй мамилелерин өнүктүрүүдөгү кызматы үчүн ардактуу "Жакшылык жарчысы" орденин тапшырды. Бул төш белги 1941-жылдын 12-февралында өлкөнүн өнүгүшүнө жана жарандык коомго сиңирген эмгеги үчүн жарандарды сыйлоо максатында негизделген. Орден чет элдик жарандарга да өзгөчө эмгеги үчүн ыйгарылат.
Ал эми Пелоси АКШ аралды колдоо милдеттенмесинен баш тартпай турганын билдирди.
"Биз Тайвандын алдындагы милдеттенмебизден баш тартпайбыз, бекем достугубуз менен абдан сыймыктанабыз", — деди ал.
Эске салсак, 2-август күнү кечинде АКШ Конгрессинин Өкүлдөр палатасынын спикери Нэнси Пелоси Тайванга барды. Ал келүүгө кам көрүп жатканда эле Кытай бийлиги Пелосинин аралга сапары "Бирдиктүү Кытай" принцибине каршы келерин жана кырдаалды курчутарын эскерткен.
Бүгүн эртең менен КЭРдин тышкы иштер министри Ван И Тайвандын Кытай менен толук биригүүсү акыры боло турган нерсе экенин айтып, Кошмо Штаттар аралдын көз карандысыздыгы үчүн кандай гана аракет кылбасын, баары текке кетерин колушчалады.
Ал эми Кремль Пелосинин сапарын аймактагы чыңалууну күчөткөн провокация деп атаган. Президенттин басма сөз катчысы Дмитрий Песков муну дүйнөнүн бардык өлкөлөрү каттап жатканын белгилеп, Россиянын Кытай менен тилектештигин белгиледи.