БИШКЕК, 2-авг. — Sputnik. Кытай өзүнүн суверендүүлүгүн коргоо үчүн зарыл чараларды көрүүгө укуктуу. Бул тууралуу Россиянын Тышкы иштер министрлиги АКШ Конгрессинин Өкүлдөр палатасынын спикери Нэнси Пелосинин Тайвандагы сапарына карата комментарий берип жатып билдиргенин РИА Новости жазды.
"Биз Тайвань булуңундагы бардык иш-аракеттер Кытайдын таза ички иши деп эсептейбиз. Кытай тарап Тайвань маселесинде өзүнүн эгемендүүлүгүн жана аймактык бүтүндүгүн коргоо үчүн зарыл болгон чараларды көрүүгө укуктуу. Россиянын принципиалдуу позициясы ушул. Тайвань Кытайдын ажырагыс бөлүгү", — деп айтылат билдирүүдө.
Эске салсак, 2-август күнү кечинде АКШ Конгрессинин Өкүлдөр палатасынын спикери Нэнси Пелоси Тайванга барды. Ал Япония, Түштүк Корея, Малайзия жана Сингапурга болгон сапарларды камтыган Азия турнесин баштаган. Андан кийин маалымат каражаттары чиновниктин Тайванга баруу ниети тууралуу массалык түрдө жаза башташты. Ал өзү коопсуздук талаптарына таянып бул маалыматты тастыктабай келген. Ал арада расмий Пекин Пелосинин аралга сапары “Бирдиктүү Кытай” принцибине каршы келерин жана кырдаалдын курчушуна алып келерин эскерткен.