БИШКЕК, 2-авг. — Sputnik. АКШ Конгрессинин Өкүлдөр палатасынын спикери Нэнси Пелосинин Тайванга күтүлүп жаткан сапары Кытайда бир топ дүрбөлөң жаратууда.
Бүгүн түшкө маал жергиликтүү ЖМКлар Тайвандын Фуцзянь провинциясында аскердик машыгуулар башталганын жазып чыгышты. Иш-чара 5-августка чейин созулары айтылып, башка каттамдар токтотулду.
Ошол эле учурда социалдык тармакта Фуцзянь провинциясынын коомдук жайларында аскердик техника ары-бери каттап жаткан сүрөттөр пайда болду.
Ал ортодо Sputnik Ближнее зарубежье Telegram каналы Тайванда Пелосинин келишине каршы болгондор дагы бар экенин жазды. Көчөгө чыккандар америкалык конгрессмендердин келишине нааразы болууда.
Маалыматка караганда, Пелоси шейшемби күнү саат 21:30дар (Бишкек убактысы боюнча 19:30) чамасында Тайванга учары, шаршемби күнү эртең менен мейманканада видеоконференция өткөрөрү божомолдонууда.
Эске салсак, Пелосинин 2-августта Тайванга барышы мүмкүн экени айтылган. Адегенде Пелоси баштаган америкалык делегациянын Тайванга сапары апрель айына пландалган. Пекиндин нааразычылыгын жарата турган бул сапар АКШ Конгрессинин Өкүлдөр палатасынын спикеринин 1997-жылдан бери аралга жасаган алгачкы сапары болот.
Бирок Пелосинин Кытайдагы арал Тайванга божомолдонуп жаткан сапары Пекин менен Вашингтондун ортосуна жик салып, жалпы эле аймактагы абалды начарлатып коюшу мүмкүн экени айтылууда. Кытай АКШдан ички саясатына кийлигишпөөнү талап кылып келет.
Мисалы, кытай лидери Си Цзиньпин АКШнын президенти Жо Байденге "от менен ойнобош керектигин" эскертип, АКШ менен Кытайдын кагылышуусу ааламга апаат алып келерин айткан.
Ал эми Кытайдын БУУдагы туруктуу өкүлү Чжан Цзюнь КЭР армиясы Тайванды бөлүп кетүү аракеттерине каршы бардык ыкмаларды колдонорун билдирген.
Жергиликтүү Global Times гезити Пелосини киргизбеш үчүн Тайвандын тегерегиндеги аба жана деңиз мейкиндигине кирүүгө тыюу салып, АКШ өкүлү учуп келе жаткан учакты аскерлер абадан тосуп алышы мүмкүн экенин жазган.
Ошол эле учурда АКШнын мамлекеттик катчысы Энтони Блинкен "Тайванда кырдаал курчуса Кытай өзү жоопкерчиликтүү болот" деп күнөөнү Пекинге оодара коюуга аракет кылууда. Ал "Кытай кырдаалды чыңалтпай сабырдуу болушу керек" деп эсептейт.
Адегенде Пелоси баштаган америкалык делегациянын Тайванга сапары апрель айына пландалган. Кытай өкмөтү менен арал провинциясынын ортосундагы расмий мамиле 1949-жылы үзүлгөн. Ага Кытайдын Коммунисттик партиясы менен жарандык согушта жеңилип калган Гоминьдандын аскерлери Тайванга көчүп кетиши себеп болгон. Арал менен материктин ортосундагы бизнес жана бейрасмий байланыштар 1980-жылдардын аягында кайра жанданган. 1990-жылдардын башынан тартып тараптар Пекин ассоциациясы жана Тайбэйдин кысыктар аралык алмашуу фонду сыяктуу бейөкмөт уюмдар аркылуу байланыша башташкан.