БИШКЕК, 27-июл. — Sputnik. Энергиянын кайра жаралуучу булактарын пайдалануу менен өндүрүлгөн электр энергиясын сатып алууда аукциондук тарифтер системасы белгиленген тарифтерге адилет альтернатива боло алат. Бул тууралуу Жаратылыш ресурстары, экология жана техникалык көзөмөл министрлигинин алдындагы Климаттык каржылоо борборунун долбоорлорду даярдоо фондунун эксперти Бекнур Маратбеков билдирди.
Ал Sputnik Кыргызстан агенттигинин мультимедиалык маалымат борборундагы "Кайра жаралуучу энергия боюнча мыйзам инвестициялык климатты бузабы? Мамлекеттик органдар кырдаал тууралуу" аттуу брифингге катышты.
Эксперттин айтымында, энергиянын кайра жаралуучу булактары боюнча долбоорлорду ишке ашырууга көптөгөн тараптар тартылган. Алар: Энергетика министрлиги, Жаратылыш ресурстары, экология жана техникалык көзөмөл министрлиги жана бизнес-коомчулук.
© Sputnik / Асель Сыдыкова
"Энергиянын кайра жаралуучу булактары боюнча мыйзамдарды иштеп чыгууда сатып алуучу уюмдардын укуктары бузулбашы керек. Негизи Кыргызстанда калк үчүн тарифтер эң жогорку эмес, бирок кайра жаралуучу энергияга болгон тарифтер дагы эң төмөн эмес. Коңшу мамлекеттер туруктуу тарифтерден аукциондук тарифтерге өтүп жатышат. Менин оюмча, энергиянын кайра жаралуучу булактарында рыноктук принцип иштеши керек. Мисалы, сапаты жогору, баасы төмөн болсо — бул жеңиш", — деди ал.
Маратбеков белгилегендей, энергиянын кайра жаралуучу булактары боюнча долбоорлорду жөнгө салуучу ченемдер бардык тараптардын кызыкчылыгына жооп бериши керек.
"Мурда бизде квота болгон, башкача айтканда электр энергиясынын белгилүү бир көлөмүн гана сатып алууда максималдуу тарифтерди бере алмакпыз. Бирок жаңы мыйзамга ылайык, чектөөлөр алып салынган. Эми тариф бардык көлөмгө, энергиянын кайра жаралуучу бардык булактарына тиешелүү болот. Бул мамлекеттик үлүшү бар энергетикалык компаниялар үчүн оор болуп калат", — деп түшүндүрдү ал.
Маселенин төркүнү
Адистер "Энергиянын кайра жаралуучу булактары жөнүндө" жаңы мыйзам инвесторлорду оолактатат деп эсептейт. Жерди ижарага берүү, электр энергиясын сатып алуу боюнча жоболордо, мамлекеттик органдардын функцияларында жана башка пунктуларда карама-каршылыктар белгиленген. Эксперттер ушул сыяктуу учурлар энергиянын кайра жаралуучу булактарына байланыштуу башка ченемдик-укуктук актыларда да бар экенин белгилешет.