БИШКЕК, 26-июл. — Sputnik. Президент Садыр Жапаров бүгүн, 26-июлда, Чолпон-Ата шаарында өтүп жаткан Түрк тилдүү мамлекеттердин атайын кызматтарынын 24-конференциясынын (ТҮРКОН) делегациясынын башчыларын кабыл алды. Бул туурасында мамлекет башчынын маалымат кызматынан кабарлашты.
Жапаров Улуттук коопсуздук кызматтарынын жетекчилери менен жолугушууда көп кылымдык ынак коңшулаштык тажрыйба жана өлкөлөр менен элдердин жемиштүү кызматташуусу ТҮРКОНдун алкагында өз ара алаканы чыңдоого негиз болоруна токтолгон. Андан сырткары, конференция 24 жылдан бери коопсуздук чөйрөсүндө кызматташуунун жана профессионалдык көйгөйлөрдүн кеңири спектрин талкуулоонун, тажрыйба алмашуунун, коопсуздук жаатында кызматташуунун эң натыйжалуу моделдерин иштеп чыгуу үчүн зарыл аянтча болуп калганын белгилеген.
"Бүгүнкү күндө Жакынкы Чыгышта жана Афганистанда айрым мамлекеттердин бүтүндүгүнө коркунуч туудурган жана бул аймактардын чектеринен да алыска жайылып кетүү коркунучу бар масштабга жеткен террордук аракеттердин күчөшү биздин кызматтардан өзгөчө көңүл бурууну талап кылат. Бул коркунучтарга жана чакырыктарга каршы күрөштө ырааттуу жана системалуу иш, биргелешкен жана координацияланган күч-аракеттер аркылуу гана олуттуу натыйжаларга жетишүүгө болору ырас", — деген Жапаров.
Ал жаңы заман көйгөйлөрдү чечүүдө, коркунучтарды жоюуда жаңы мамилени талап кыларына токтолгон.
"Ушуга байланыштуу бул аянтчанын мазмундуу жана конструктивдүү талкуулары түрк тилдүү мейкиндикте коопсуздукту камсыздоого олуттуу салым кошот деп ишенем. Ошол эле учурда конференцияга катышкан мамлекеттердин атайын кызматтарынын өз ара тыгыз кызматташуусу биздин өлкөлөрдөгү коопсуздукту бекемдеп, эл аралык террорчулукка, экстремизмге жана башка глобалдык көйгөйлөргө каршы натыйжалуу күрөшкө көмөктөшөт", — деген президент.
Жапаров кыргыз тарап боордош түрк тилдүү элдер менен бул баалуулуктардын негизинде жемиштүү иш алып барууга даяр экенин билдирген.
Маалымат үчүн: 1998-жылдын 20-майында Стамбул шаарында Азербайжан, Казакстан Кыргызстан жана Түркиянын Республикасынын атайын кызматтары Түрк тилдүү мамлекеттердин атайын кызматтарынын конференциясын түзүү жөнүндө протоколго кол коюшкан (ТҮРКОН). 2018-жылдан тарта бул уюмга Өзбекстандын Мамлекеттик коопсуздук кызматы мүчө болгон.
Жолугушууга Улуттук коопсуздук мамлекеттик комитетинин төрагасы Камчыбек Ташиев, Азербайжандын Мамлекеттик коопсуздук кызматынын башчысы Али Наги оглы Нагиев, Азербайжандын Тышкы чалгындоо кызматынын жетекчисинин орун басары Самир Вугар оглу Исмайлов, Казакстандын Улуттук коопсуздук комитетинин төрагасы Ермек Сагимбаев, Түркиянын Улуттук чалгындоо уюмунун директору Хакан Фидан жана Өзбекстандын Мамлекеттик коопсуздук кызматынын төрагасы Абдусалом Азизов катышкан.