БИШКЕК, 24-июл. — Sputnik. ДССУ башчысы Тедрос Адханом Гебрейесус маалымат жыйын учурунда маймыл чечегинин жайылышын эл аралык деңгээлдеги өзгөчө кырдаал деп жарыялады.
"Маймыл чечегинин жайылышы коомдук саламаттык сактоо тармагындагы эл аралык мааниге ээ болгон өзгөчө кырдаал деп эсептейм", — деди Гебрейесус.
Белгилей кетсек, өзгөчө кырдаал комитети бул маселе боюнча бир пикирге келе элек.
Акыркы мезгилде 75 мамлекетте маймыл чечегин илештирип алган 16 миң учур катталган. Ошол эле учурда адистер оору кандай жол менен жугуп жатканын аныктай элек. Буга чейин вирусолог маймыл чечеги коронавирус инфекциясынын козгогучу сыяктуу кеңири жайылып кетпей турганын айткан.
Маймыл чечеги — вирустук инфекция, ал адамдарга да жугушу мүмкүн. Бул жеңил оору болуп саналат жана жуктуруп алгандардын көбү бир нече жуманын ичинде айыгып кетишет. Бирок кээ бири кыйналышы мүмкүн. Адистер маймыл чечегин жыныстык жол менен жугуучу инфекция деп эсептебейт. Бирок оорулуу адам менен жакын байланышта болгондор жугузуп алышы мүмкүн. Оорунун алгачкы белгилерине ысытма, баш оору, булчуңдардын оорушу, белдин оорушу, лимфа бездеринин шишип кетиши, чыйрыгуу жана чарчоо кирет. Көбүнчө беттен башталып, дененин башка бөлүктөрүнө исиркектер чыгат.