БИШКЕК, 22-июл. — Sputnik. Россия, Түркия жана БУУнун өкүлдөрү РФтин азык-түлүгүн экспорттоого коюлган чектөөлөрдү алып салуу жана Украинанын дан эгиндерин чыгарууга Россиянын жардам көрсөтүүсү боюнча документтерге кол коюшту.
Салтанатка Түркиянын президенти Режеп Тайип Эрдоган, БУУнун башкы катчысы Антониу Гутерриш жана Россиянын коргоо министри Сергей Шойгу катышты. Буга чейин Украина келишимдин өзүнө тиешелүү бөлүгүнө кол койгон.
Азык-түлүк боюнча келишимде эмнелер камтылган:
Украинанын эгиндери Кара деңиз аркылуу Одесса, Черноморск жана Южный сыяктуу үч порттон чыгарылат;
Украина портторунан миналар алынбайт. Эгинди алып чыгуу үчүн коопсуз фарватер колдонулат;
Украин эгинин Кара деңиз аркылуу алып өтүү боюнча келишимдин мөөнөтү 120 күн. Бул мөөнөт узартылышы ыктымал;
Макулдашуунун аткарылышын Стамбулдагы төрт тараптуу координациялык борбор координациялайт;
Кемелерге аскердик коштоо каралган эмес. Аскердик кеме, учактардын аларга белгиленген аралыкта жакындашына тыюу салынган;
Украинанын портторунан айына 5 миллион тоннадан буудай алып чыкса болот;
Биргелешкен координациялык борбордун көзөмөлүндөгү инспекциялык топтор портторго бара жаткан кемелерде курал-жарактын бар-жогун текшерет;
БУУ, Түркия жана Украинанын өкүлдөрү порттордо эгиндин жүктөлүшүнө көз салышат.
БУУ дандын жетишсиздигинен улам азык-түлүк кризиси келе жатканын бир эмес бир нече ирет айткан. Батыш Россияны дүйнөлүк рынокко украин данын чыгарууда тоскоолдук кылып жатат деп айыптап келет. Ал эми Россиянын президенти Владимир Путин Украинадан эгин экспорттоодо эч кандай маселе жок экенин жана Москва буга кийлигишпей турганын билдирген.