БИШКЕК, 15-июл. — Sputnik. Быйыл "Манас" эл аралык аэропортун модернизациялоого конкурс өткөрүп, макулдашууга кол коюу пландалууда. Бул тууралуу Мамлекеттик-жеке өнөктөштүк (МЖӨ) борборунун директору Санжарбек Болотов билдирди.
Ал бүгүн Sputnik Кыргызстандын маалымат борборунда өткөн "2022-жылы Мамлекеттик-жеке өнөктөштүктүн негизинде кандай долбоорлор ишке ашырылат" аттуу брифингге катышты.
Анын айтымында, азыр техникалык-экономикалык негиздемеси даярдалып бүттү. Июнь айында Германия, Корея, Индия, Аргентина, Россия, Түркия жана Франциянын компанияларынын катышуусунда инвесторлордун конференциясы өткөрүлгөн.
"Конференциядан кийин бизге бир катар компаниялар кайрылып, долбоорго аябай кызыгышты. Учурда конкурс жарыялоо боюнча жетекчилик менен консультация соңуна чыгып калды. Мамлекеттик-жеке өнөктөштүк — менчиктештирүү эмес. Бул убактылуу мамиле, жыйынтыгында жаңыланган жана жакшыртылган аэропорт бизде калат. Кийинчерээк башка аэропорттор боюнча да долбоорлорду ишке ашырууга киришебиз", — деди Болотов.
Ошондой эле ал долбоор аба майдандын инфраструктурасын жакшыртуу менен гана тим болбостон, туристтик секторду колдоп, түз авиакаттамдарды ачууга, тейлөөнү жакшыртууга, мамлекеттин кирешесин көбөйтүүгө шарт түзөрүн белгиледи.
"Алдыдагы эки жылда аэробекет менен учуп-конуу тилкеси модернизацияланып, жаңы жүк терминалы, унаа токтотуучу жай, перрон салынат. Иштин жыйынтыгы кийинки жылы эле көрүнө баштайт. Себеби 1970-жылы курулуп, учурда толук реконструкциялоо талап кылынып жаткан учуп-конуу тилкесин кеңейтип, жаңыдан салуу биздин алгачкы тапшырмабыз", — деди борбордун директору.
Эске салсак, буга чейин өкмөт "Манас" жана "Ош" эл аралык аэропортторунун 50 пайыздык үлүшү түркиялык YDA INŞAAT компаниясына берилерин айткан. Компания эки жылдын ичинде 501 миллион долларга чейин инвестиция салып, аэропорттордун учуп-конуу тилкесин үчүнчү класстагы деңгээлге жеткирип, жаңы аэробекет жана жүк терминалын сала турганы белгиленген. Ал эми ЖК депутаты Жанар Акаев аба майдандардын анча белгилүү эмес компанияга берилгени жатканын сындап, мындай келишим улуттук кызыкчылыкка каршы келерин билдирген. Кийинчерээк бийлик бул идеядан баш тартты.