БИШКЕК, 14-июл. — Sputnik. Күндүн табынан электр энергия алып, орточо көлөмдөгү үйдү жылытуу үчүн канча каражат керектелет. Бул туурасында Sputnik Кыргызстандын маалымат борборунда өткөн брифингде Энергиянын кайра жаралуучу булактарды өнүктүрүү жана майнаптуулугун арттыруу боюнча борбордун президенти Татьяна Веденева айтып берген.
"Күндүн энергиясы тууралуу кеп болуп жатса, эгерде болжол менен 10 киловатт жаксаңыз, ал 25-30 миң доллар турат. Анан да ар беш жылда аккумуляторду алмаштыруу керектигин эске алыш керек", — деген Веденева.
Ал өнүккөн көп өлкөлөрдө жарандарды электр кубатын өндүрүү боюнча иштерге тарткан микрогенерация механизми колдонуларын айтты.
"Үйүңүздүн чатырына күн панелдери орнотулган дейли. Сиз үйдө жокто электр кубаты башкаларга өтө берет. Үйгө келип электр кубатын тармактан аласыз да, болгону айырма үчүн эле төлөйсүз. Көп өлкөлөрдө мындай механизм колдонулуп келет, электр кубатынын тартыштыгын азайтуу үчүн калкка электр энергияны алуу кандай кымбатка турарын жеткириш керек. Ал эми кээ бир учурларда андан акча жасаса болорун да түшүндүрүү керек", — деген эксперт.
Веденеванын айтымына караганда, Кыргызстанда "микрогенерация" деген түшүнүк жок: аны энергиянын кайра жаралуучу булактары жана энергетика жөнүндө мыйзамга киргизүү туура болот, андан сырткары мыйзамдык актыларды иштеп чыгыш керек.