БИШКЕК, 12-июл. — Sputnik. Россияда биринчи ирет Европадан келген жигиттен маймыл чечеги чыкты. Бул тууралуу РИА Новости кабарлады.
"Оору Европа өлкөлөрүн кыдырып келген адамдан табылды. Ал денеси кызарып, исиркектер чыгып кеткендиктен ооруканага кайрылган", — деп айтылат Роспотребнадзор тараткан релизде.
Маалыматта илдет жеңил өтүп жаткандыгын, өмүр үчүн кооптуулук жок экендиги жазылган. Аны медиктер ооруканада өзүнчө обочолонтуп, дарылап жатат.
Роспотребнадзор "инфекциянын андан ары жайылып кетүү мүмкүнчүлүгү жабылгандыгын" билдирген. Ведомстводо өлкөдө маймыл чечегин аныктоочу реагенттер топтому жетиштүү экенин белгиледи.
Эске салсак, Дүйнөлүк саламаттык сактоо уюму маймыл чечеги боюнча абал дүйнө жүзүндө өзгөчө кырдаал жарыялоого жетпесе дагы өтө оор экенин билдирген.
Ал эми мындан бир нече күн Кыргызстан менен ар кыл тармакта тыгыз байланышта болгон Түркиядан да катталганы кабарланган.
Маймыл чечеги — вирустук инфекция, ал адамдарга да жугушу мүмкүн. Бул, адатта, жеңил оору болуп саналат жана жуктуруп алгандардын көбү бир нече жуманын ичинде айыгып кетишет. Бирок кээ бири кыйналышы мүмкүн. Адистер маймыл чечегин жыныстык жол менен жугуучу инфекция деп эсептебейт. Анткен менен оорулуу адам менен жакын байланышта болгондор жугузуп алышы мүмкүн. Оорунун алгачкы белгилерине ысытма, баш оору, булчуңдардын оорушу, белдин оорушу, лимфа бездеринин шишип кетиши, чыйрыгуу жана чарчоо кирет. Көбүнчө беттен башталып, дененин башка бөлүктөрүнө исиркектер чыгат.