БИШКЕК, 12-июл. — Sputnik. Өзбекстандын тышкы иштер министринин милдетин аткаруучу Владимир Норов Каракалпакстандагы башаламандык учурунда колдоо көрсөткөнү үчүн Россияга ыраазычылык билдирди. Бул туурасында РИА Новости жазды.
"Каракалпакстандагы кырдаалды жайгаруу боюнча Өзбекстандын иш-аракеттерин колдогону үчүн Россия тарапка ыраазычылык билдирем. РФтин Тышкы иштер министрлиги тиешелүү билдирүүлөрдү жасап жатты. Биздин өлкөлөрдүн башчылары телефон аркылуу сүйлөшүп, бул маселени талкуулашты", — деди Норов.
Ошондой эле ал башаламандыктар Конституцияны өзгөртүүнү талкуулоо учурунда башталганын, болбосо дал ушундай талаштуу учурлар боюнча кеңешип, эпке келүү үчүн демилге коомчулуктун алдына коюлганын белгиледи.
"Баш мыйзамды өзгөртүүгө каршылыгын билдирүү жүйөсү менен конституциялык түзүлүшкө, аймактык бүтүндүккө жана Өзбекстандын биримдигине доо кетирүү аракети жасалды. Албетте буга сырттан кийлигишүү болбой койгон жок", — деди ТИМ башчысынын милдетин аткаруучу.
Каракалпакстандагы башаламандык
Июндун соңунда Өзбекстандын Баш мыйзамын өзгөртүү мыйзам долбоору элдик талкууга коюлган. Демилгеде Каракалпакстан референдумдун негизинде өлкөнүн аймагынан чыгып кете алган суверендүү республика катары каралган жобону алып салуу туурасында айтылган. Сунушталган өзгөртүүлөрдүн ичинде Өзбекстан президентинин ыйгарым укугун бештен жети жылга чейин узартуу, өлүм жазасына, жаранды башка мамлекетке өткөрүп берүүгө тыюу салуу сыяктуу учурлар бар.
Буга нааразы болгон миңдеген адам 1-июлда Нукус шаарында митингге чыгышкан. Ал эми 2-июлда Шавкат Мирзиёев кайра Конституциянын Каракалпакстандын суверендүүлүгүнө тийиштүү беренесине өзгөртүү киргизбөөнү сунуштаган.
Бул окуядан кийин Каракалпакстанда 2-августка чейин өзгөчө абал режими жарыяланды. Өлкөдө кырдаал 3-июлга барып турукташты.