БИШКЕК, 1-июл. — Sputnik. Келечекте куткаруу кызматын өтө сыймыктуу кесипке айландырабыз. Бул тууралуу президент Садыр Жапаров, бүгүн, 1-июлда, өлкөнүн куткаруучуларын кесиптик майрамы менен куттуктоосунда айтты.
Мамлекет башчынын маалымат кызматы тараткан куттуктоонун текстинде бүгүнкүдөй климаттык өзгөрүү, табияттын кооптуу кубулуштары, техногендик мүнөздөгү өзгөчө кырдаалдар көп болуп турган мезгилде куткаруучуларга суроо-талап күчөп жатканы айтылат.
"Табигый кырсыктар болгондо же адам кандайдыр бир кыйын кырдаалга туш болуп, алдастап айла таппай калганда куткаруучулардын караанына зар болобуз. Кандай гана кооптуу жагдай болбосун, өз өмүрүн тобокелге салып, бирөөнүн өмүрүн сактап калууга баш-оту менен кирип кеткен мүнөз ар кимдин эле табиятында боло бербейт. Дээринде бар, кесибинин отуна күйүп, суугуна тоңууга даяр болгон темирдей бекем эрктүү адам болуу керек", — деген Жапаров.
Президент бул кызматтын татаалдыгын эске алуу менен социалдык-тиричилик көйгөйлөрдү чечүү багытында иштер уланып жатканын айтты.
"Ишиңиздердин майнаптуулугун жогорулатуу максатында заманбап техникалар жана шаймандар менен камсыздайбыз. Буюрса, Куткаруу кызматында иштөө өзгөчө сыймык жараткыдай кесипке айландырабыз. Себеби заман талабына жараша куткаруу кызматынын ролу, мааниси күндөн күнгө артып барат", — деди Жапаров.
Мындан тышкары, президент куткаруу милдетин аткарып жатып каза болгон эр азаматтарга таазим кыларын кошумчалады.