БИШКЕК, 30-июн. — Sputnik. Ысык-Көл облусунун Жети-Өгүз районундагы мектептердин биринин жогорку классынын беш окуучусу директордун тарбия иштери боюнча орун басарын сабап кеткен. Бул туурасында аталган облустук ИИБдин маалымат кызматынан билдиришти.
Окуя 2022-жылдын 18-июндан 19-июнга караган түнү болгон.
2022-жылы 19-июнда Жети-Өгүз райондук милициясына телефон аркылуу Жети-Өгүз райондук ооруканасынын Тез жардам бөлүмүнөн денесинен жаракат алып кайрылган жаран жөнүндө малымат келип түшкөн.
Саруу айылынын 25 жаштагы О.У. аттуу жараны арыз менен кайрылып, 19-июнга караган түнү саат 01:00дөр чамасында Саруу айылына караштуу орто мектептин окуучулары аны сабап кеткенин билдирген.
Мугалимдин айтканына караганда, балдар тоого чыгууга уруксат сураган, бирок ал макул болгон эмес.
О.У. Жети-Өгүз райондук хирургия бөлүмүнө жаткырылып, соттук-медициналык экспертиза дайындалган.
Аталган факт боюнча Кылмыш-жаза кодексинин 280-беренесинин негизинде ("Бейбаштык") иш козголду.
Тергөөнүн жүрүшүндө Саруу айылындагы 17 жаштагы А.Н., А.Р., И.Т., Т.Ы. жана Т. С. аттуу окуучу балдар шектүү катары кармалган.