БИШКЕК, 29-июн. — Sputnik. Швеция менен Финляндиянын НАТОго кириши Россия үчүн эч бир жаңы коркунуч алып келбейт. Бирок биз өз чек арабызды бекемдөөгө аргасыз болобуз. Бул тууралуу Россиянын Коопсуздук кеңешинин төрагасынын орун басары Дмитрий Медведевге шилтеме берип РИА Новости жазды.
"Швеция менен Финляндиянын НАТОго кириши бизге жаңы коркунучтарды туудурбайт. Бул мамлекеттер мурда Россия менен жылуу, достук мамиледе болчу. Азыр аймактык жактан ортодо талаш-тартыш жок, чек ара меселелери эчак чечилген. Эгер альянска кирип абалы азыркыдан да жакшырып кете турган болсо, анда эч нерсе дей албайбыз. Өз эрки", — деди Медведев.
Ошол эле учурда ал аталган мамлекеттер НАТОго кошулса Россия кандай кадамдарга барарын айтты.
"Эгер мындай жол менен кеңейсе, НАТОнун Россия менен кургактагы чек арасы эки эсеге узарат. Демек, биз чек араларды бекемдешибиз керек. Башкача айтканда, курал-жарак, аскерлердин саны көбөйөт. Албетте, бул нерсе эч убакта НАТОго талапкер болгон эки өлкөнүн жарандарына ырахат тартуулабайт. Ким эле анын эшигинин алдында биздин "Искандерлер", гиперүндүү ракеталар, өзөктүк куралы бар согуштук кемелер турганын жактырсын? Бирок бул айласыздык", — деди ал.
Ошондой эле ал мындан ары НАТОго кирүүгө талапкер өлкөлөрдүн жарандарынын салыгы инфраструктураны жакшыртууга эмес, коргонуу үчүн курал-жарак алууга кетип калышы мүмкүн экенин кошумчалады.