БИШКЕК, 28-июн. — Sputnik. Жогорку Кеңештин депутаты Искендер Матраимов Мамлекеттик ипотекалык компаниянын кызматкерлери 100 миң сомдон жогору маяна аларын айтып, таң калды.
Эл өкүлүнүн айтымында, МИКте 70 адам иштесе, айына кеминде эле жети миллион сом маянага коротулат. Болбосо алар документ кабыл алып, кезекке койгон техникалык жумушту гана аткарып жатышат.
"Маянаңыздар 100 миң сомдон ашык деп жатасыз. Бул жерде (парламентте — ред.) эч ким 100 миң албайт. Сиздин окладыңыз 110 миң экен, кошумча каражаты менен 150-160 миң сомго барып калса керек. Туурабы? Сиздер мамлекеттик ишканасыздар да, анан сиз президенттен көп айлык алып жатпайсызбы", — деп суроо салды депутат.
МИКтин жетекчиси Айнура Төлөгөнова айтылган кепти ырастап, 1-апрелден баштап эле ушундай суммада алып жатканын айтты.
Андан соң Матраимов мамлекеттин акчасын ипотекага коммерциялык банктар аркылуу берип жатканын сындап, өздөрү финансылык топ түзүп иштетпей жатканына нааразы болду.