БИШКЕК, 25-июн. — Sputnik. Казино ачуу мыйзамын колдоп берген депутаттарга алкыш гана айтышыбыз керек. Мындай пикирин президент Садыр Жапаров "Кабар" агенттигине берген маегинде билдирди.
Казинодон түшкөн киреше көпкө күттүрбөйт, анын саясатын колдогондорду "ар кимди ээрчип жөн эле дүрбөлөңгө түшпөөгө" чакырган.
"Бир-эки жылдан кийин рахмат айтасыңар. Чыдап тургула. Мыйзамды колдоп берген, мамлекеттин кызыкчылыгын саясий популизмден жогору койгон эл өкүлдөрүнө дагы бир жолу ыраазычылык билдирем. Мен "сүф" деп эле экономиканы көтөрүп койчу сыйкырчы эмесмин. Тиешелүү ар кандай мыйзамдарды колдоп берип тургула. Элдин жашоосун тездик менен оңдоп алалы. Анча-мынча популисттерди ээрчип кетпегиле", — деген Жапаров.
Ал эми казиного каршы болгон депутаттарды элдин диний ишеними менен ойноп, эптеп бийликке келүүнү эңсеп жатышат деп айыптады.
"Силерге саясий упай керек болсо, мага элдин бакубат турмушу маанилүү. Силерге саясий рейтинг зарыл болсо, мага кубаттуу экономика керек. Жогорку Кеңеш ишке кирген жети айда эл турмушун оңдой турган бир да мыйзам же сунуш айтпай, саясий шоу менен гана алек болгон айрым популист депутаттарды элибиз өзү талдап, баасын берет. Ага убакыт келет", — деген президент.
Ошондой эле ал казино ачылса жогорку маяна төлөй турган 15 миң жумуш оруну пайда болорун айткан.