БИШКЕК, 23-июн. — Sputnik. Буга чейин президент Садыр Жапаровдун жарлыгы менен иштен четтетилген Жумгал райондук сотунун судьясы Ачылбек Арзиев УКМКнын тергөө абагына киргизилди. Бул туурасында аталган ведомствонун маалымат кызматынан кабарлашты.
Опузалап талап кылуу жана акча алуу фактысы боюнча катталып козголгон кылмыш ишинин алкагында Жумгал районунун судьясы А.А.М. жана Жумгал районунун прокурорунун орун басары О.Ж.К. акча алып жаткан жеринен кармалышкан.
Буга байланыштуу 2022-жылдын 23-майында судьяга мындан ары кылмыш жоопкерчилигине тартуу боюнча Кылмыш-жаза кодексинин 343-беренеси ("Пара талап кылуу") боюнча иш козголгон. Анткен менен мурдараак Соттор кеңеши Жумгал райондук сотунун судьясы пара менен кармалды деген маалыматты 21-майда четке кагып, билдирүү тараткан эле. Бирок 10-июнда Судьялар кеңеши Башкы прокуратуранын судьясы Арзиевди кылмыш жоопкерчилигине тартуу боюнча сунушун канааттандырган.
Ал эми прокурордун кармалган орун басары О.Ж.К. мурдараак эки ай мөөнөткө УКМКнын тергөө абагына киргизилген.