БИШКЕК, 22-июн. — Sputnik. Азыр ыймандуу көрүнгөн депутаттар мурда казинодон чыга албай жатып калганын билем. Бул туурасында УКМК төрагасы Камчыбек Ташиев парламентте билдирди.
Жогорку Кеңештин айрым депутаттары казино иштетүү динге каршы келерин айтып, уруксат берүүгө каршы чыгууда.
"Көпчүлүк депутаттар ыйманды, динди кошуп айтып жатасыздар. Биз деле баарыбыз намаз окуган жигиттербиз, бирок "ыйман" деген жигиттерди да билем. Кайсы акча алмаштыруучу жайды иштетип, канча пайыздык ставка менен каражат берип жатканыңар тууралуу маалыматым бар. "Ыйман" деп коюп канча акчаны каерге алып барып берип жатканыңар документалдуу сакталган. Ыйманды айтып отурган депутаттардын казиного барып чыга албай, күнү-түнү жаткандары бар. Ал депутаттарды баарыбыз билебиз. Банкрот болуп калып кеткендер ушул жерде сүйлөп отурасыңар", — деди Ташиев.
Ошондой эле УКМК төрагасы депутаттарды бул маселени саясатташтырбай жакшылап ойлонуп, эл-журтту багып алууга аракет кылууга чакырды.