БИШКЕК, 21-июн. — Sputnik. Министрлер кабинетинин төрагасы Акылбек Жапаров ЕАЭБ өлкөлөрүн Кыргызстанда өндүрүлгөн товарларды сатып алууга үндөдү. Бул тууралуу өкмөттүн маалымат кызматы билдирди.
Бүгүн Минск шаарында Кыргызстандын төрагалыгы астында Евразия өкмөттөр аралык кеңешинин кеңейтилген форматтагы жыйыны өткөн.
Өкмөт башчы өлкөнүн ички дүң продукциясы январь-май айларында 270,2 миллиард сомго жетип, реалдуу өсүү темпи 105,7 пайызды түзгөнүн маалымдады.
"Бүгүнкү күндө Кыргызстанда өндүрүлгөн тигүү-текстиль продукциясынын сапаты жана дизайны белгилүү фирмалык кийим-кече өндүрүүчүлөрдөн кем калышпайт. Балдарга арналган экологиялык жактан таза тамак-аш өндүрүү, машина курууну өнүктүрүү, лифт жабдууларын жана тетиктерин чыгаруу боюнча долбоорлорго катышууга даяр ишканалар бар. Буга байланыштуу ЕАЭБдин алкагында өнөр жай тармактарында кооперация жана импортту алмаштыруу боюнча комиссия түзүү тууралуу бүгүн кабыл алынып жаткан чечимибиз абдан туура", — деди Жапаров.
Ошондой эле ал ЕАЭБдин экономикалык жана финансылык туруктуулугун камсыздоо үчүн биргелешкен аракеттерди консолидациялоо зарылдыгын белгилеп, бир катар ыкчам чараларды сунуштады.
"Биринчиден, кыска мөөнөттүү келечекте ЕАЭБ ички рыногунда социалдык мааниге ээ азык-түлүк товарларынын тартыштыгын минималдаштыруу механизмдерин киргизүү зарыл. Кийинки приоритеттүү чара биримдикке мүчө өлкөлөрдүн финансы рыногунун жана экономикасынын тышкы таасирлерге туруктуулугун бекемдөө. Аны менен катар финансылык ресурстарды натыйжалуу мобилизациялоо, инвестициялоо үчүн шарттарды түзүү болуп саналат. ЕАЭБ өлкөлөрүнүн транзиттик потенциалын тез арада кеңейтүү да маанилүү", — деди министрлер кабинетинин төрагасы.
Жапаров сөзүн жыйынтыктап жатып катышуучуларды жайында Ысык-Көл жээгинде өтө турган Евразиялык өкмөттөр аралык кеңешинин кезектеги жыйынына чакырды.