БИШКЕК, 18-июн. — Sputnik. Американын Экономикалык изилдөөлөр институтунун президенти Уильям Рюгер Fox News телеканалына берген маегинде Америка Кошмо Штаттарынын Россияга каршы санкциялары "өзүн-өзү бутка атып салууга барабар" деп баа берди. Бул тууралуу РИА Новости жазды.
"Кайсы бир мамлекет башчыны өз улутунун кызыкчылыгы үчүн маанилүү деп эсептеген нерселеринен баш тарттыруу кыйын. Россияны ала турган болсок, Украинага байланыштуу абалда алар өз кызыкчылыгын ойлоп жатат. Бул кадыресе көрүнүш", — деди ал.
Рюгердин айтымында, окумуштуулар бир нече жылдан бери санкциялардын таасири жана кесепети боюнча изилдөөлөрдү жүргүзүп келген. Жыйынтыгында алар мындай кысымдар эч кимге пайда алып келбесин аныкташкан.
"Алгач санкциялар жарыяланган тарапка бир той көйгөй алып келчүдөй сезиле берет. Бирок жыйынтыгында эки тарап тең, өзгөчө карапайым эл азабын тартат. Бул бийлик өзүн-өзү бутка атып алгандай эле көрүнүш", — деди адис.
24-февралда Россия Украинаны демилитаризациялоо боюнча атайын операциясын баштаган. Президент Владимир Путин анын максатын "сегиз жылдан бери Киев режими тарабынан геноцидге дуушар болгон адамдарды коргоо" деп атаган. Буга жооп катары Батыш өлкөлөрү Россияга каршы бир катар жаңы санкцияларды киргизишти, көптөгөн чет элдик компаниялар Россиядагы ишин токтоткон.
Москвага каршы санкциялык басым буга чейин эле АКШ жана Европа үчүн экономикалык көйгөйлөргө айланып, күйүүчү майга жана азык-түлүккө болгон баанын олуттуу өсүшүнө алып келген.