БИШКЕК, 18-июн. — Sputnik. Кара-Суу райондук милициянын аймактык тескөөчүсү Сыймык Мырзабеков Курбан-Кара айылындагы Савай каналына чөгүп кетип каза болду. Бул тууралуу Ош облустук ички иштер башкармалыгы билдирди.
Маалыматка ылайык, окуя 16-июнь күнү кечке жуук болгон. Маркум аталган каналга үч кесиптеши менен барып, балдарга сууга чөмүлүү кооптуулугун эскертишкен.
"Каналдын жээгинде турган эки балага сууга түшпөө боюнча түшүндүрүү иштерин жүргүзүшкөн. Алар балдарды кетирип койгондон кийин өздөрү сууга түшкөн. Сыймык Мырзабеков суунун ортосуна жеткенде чабак ура албай чөгүп жатканын көрүп, бирге барган шериктери куткарууга аракет кылышкан. Бирок натыйжа болгон эмес", — деп айтылат маалыматта.
Аймактык тескөөчүнү табуу үчүн Кара-Суу РИИБдин 130 кызматкери, ӨКМден 38 куткаруучу тартылган. Алар Өзбекстан менен чектеш Ак-Таш айылына чейин барышып 12 чакырымдык аралыкты издешкени айтылды.
Натыйжада бүгүн, 18-июнда, саат 8:30 чамасында сөөгү табылган.
Бул окуя боюнча ИИМдин ички иликтөө кызматынын Ош шаары жана облусу боюнча бөлүмү тарабынан кызматтык иликтөө жүрүп жатат.
Милициянын лейтенанты Сыймык Мырзабеков 22 жашта болчу, Ош облусунун Кара-Кулжа районундагы Жетим-Дөбө айылында туулган. ИИМ Академиясын аяктап, 2021-жылдын 4-ноябрынан тарта Кара-Сууда аймактык тескөөчү болуп иштеп жаткан.
Ош облустук милициясы Мырзабековду кызмат өтөп жатып каза болду деп белгиледи.