БИШКЕК, 18-июн. — Sputnik. Бүгүн атасы же апасы миграцияга кеткен балдарда өзүнчө дүйнө тааным калыптанып, мээрими жок мерез болуп өсүп жатат. Бул тууралуу педагог, эл агартуунун отличниги Үрниса Кадыралиева Sputnik Кыргызстан агенттигине курган маегинде билдирди.
Ал элдик педагогика, бала тарбиялоо темаларына токтолгон.
"Бүгүн биз материалдык жактан атаандашып күн кечирүү кызыгына кирип кеттик. Акчаны шылтап баланын сагынычын, кусалыгын, жан дүйнөсүндөгү абалын төрөгөн эне өзү сезбей көр оокатка батып кетти. Илгери согуш убагында бир ууч машак менен бир казан атала кайнатып эле тууган-туушкан, кошуна-колоңдун балдары чогуу өзөк жалгачу экен. Азыр ач көзбүз. Бүгүн атасы же апасы миграцияга кеткен балдарда өзүнчө дүйнө тааным калыптанып, мээрими жок мерез болуп өсүп жатат. Анын үстүнө демократия, тең укуктуулук деп да балдардын башын айлантып салдык", — деген педагог.
Кадыралиева азыр балдары менен чогуу отуруп сабак окуган ата-эне өтө аз экенине токтолгон.
"Мугалим берген тапшырманы үйдөн ата-эне улантып балага түшүндүрүп, үй ишин аткартуу керек. Бирок айрым энелер китебин көтөрүп барган баласын "барчы башымды оорутпай" деп кагат. Кээ бирлер үйдөн да тапшырма аткартуучу мугалим жалдап коюшат. Мындай учурда ата-эне баладан алыстап, сыртта калып жатат. Куранда "бейиш эненин таман астында, баланын башында" деген сөз бар эле. Бүгүн "баланын башында" деген жери унутулуп калды. Бул баланы мыкты тарбиялоо да бейишке жетелейт дегенди туюнтат. Бала төрөлгөндөн баштап анын жөндөмүнө, акыл-дараметине көңүл бөлбөй жатабыз", — деген ал.
Педагогдун маегин толугу менен Sputnik Кыргызстан агенттигинен окуй аласыздар.