Асмандан тартылган кадрлардан заводдун аймагындагы талкаланган имараттарды, чачылып жаткан темир-тезектерди, ээнсиреп турган бийик курулуштарды көрүүгө болот.
Эскерте кетсек, аталган катакомбада (коридорлору, өтө кенен эмес бөлмөлөрү жана тар өтмөктөрү бар жер алдындагы жай — ред.) жаткан согушкерлердин акыркылары 20-майда чыгып, 531 согушкер туткунга түшүп бергендигин РФтин Коргоо министрлиги билдирген.
Министрликтен 16-майдан тарта операциянын жүрүшүндө тосулуп, заводдун аймагында калып калгандардан, тагыраагы, Украина тараптын күчтөрүнөн 2 439 киши колго түшкөнүн маалымдаган. Алар комбинаттын аймагында жалпы жонунан бир айга чукул болушкан.
ДЭР башчысы Денис Пушилин 6-июнда "Азовсталдан" колго түшкөндөр менен кошо багынып бербей, алигиче жашырынып жүргөн согушкерлер кармалгандыгын билдирген. Мындай болуп жалгыз-жарымдап "адашып" калгандар кездешкенин, бирок алар кооптуулук жаратпай тургандыгын кошумчалаган.