БИШКЕК, 14-июн. — Sputnik. Саат 17.30га карата алынган маалымат боюнча, кыргыз-тажик чек арасында кырдаал чыңалган бойдон турат. Бул тууралуу УКМКнын Чек ара кызматы билдирди.
Маалыматка караганда, Булак-Башы жерлигинде Кыргызстандын Баткен жана Тажикстандын Согди багыты боюнча чек ара өкүлдөрүнүн жолугушуусу аяктады.
"Тараптардын ар бири болуп өткөн куралдуу окуя боюнча өз дооматтарын билдиришти. Кыргыз тарап кырдаалды курчуткан тажик чек арачыларына карата жүйөлүү аргументтерди келтирди", — деди Чек ара кызматы.
Жолугушуунун жыйынтыгында тараптар төмөнкүдөй чечимдерди кабыл алышты:
Булак-Башы жерлигиндеги чек ара кезметтеринин жүрүү маршруттарын тактоо;
окуя болгон жерге тартылган кошумча күч жана каражаттарды алардын туруктуу жайгаштыруу пунктуларына кайтаруу;
"Булак-Башы" (КР) жана "Кех" (ТР) чек ара постторунун башчыларын күн сайын жолугуп, кырдаал боюнча маалымат алмашууга милдеттендирүү;
тараптарды мурда казылган траншеяларды көмүүгө милдеттендирүү;
жер участоктору чек арага жакын жайгашкан жарандардын айыл чарба иштерин жүргүзүүсүнө тоскоолдук жаратпоо.
Жакынкы аралыкта эки республиканын чек ара делегацияларынын дагы бир жолугушуусу күтүлүүдө.
Белгилей кетсек, бүгүн эртең менен саат 06:50-07:00дөр чамасында Баткенде Тажикстандын "Кех" чек ара заставасы Кыргызстандын "Булак-Башы" чек ара заставасын көздөй аткылаган. Буга жооп катары кыргыз тарап да ок чыгарган. Окуя болгон жерге чек ара отряддарынын жетекчилери жөнөп кетишкен. Анткен менен саат 07:50дө тажик тарап гранатомёт жана миномётторду колдонуу менен кайрадан ок чыгарып, саат 8:10до токтогон.