БИШКЕК, 11-июн. — Sputnik. Аскар Айтматов, Бакыт Бакетаев, Кубан Абдымен, Токтогул Какчекеев, Марс Сариев башында турган саясат таануучулардын тобу серепчи Марат Казакпаевдин өлүмүнүн себебин тыкыр иликтөөнү өтүнүштү. Эксперттер бул тууралуу маркумга арналган некрологдо айтышкан.
Анда Марат Казакпаевдин кадыр-барктуу саясат таануучу, эл аралык көйгөйлөр багытында белгилүү адис, саясат таануу жана экономика саясаты боюнча окутуучу, изилдөөчү жана жакшы адам болгону белгиленет. Серепчинин дүйнө салышы ага-тууганы, жакындары жана ата мекендик илим менен билим берүү үчүн чоң жоготуу деп бааланган.
"Тиешелүү органдардан Марат Казакпаевдин өлүмүнүн себеби тыкыр иликтенишин өтүнөбүз", — деп айтылат некрологдо.
Эскерте кетсек, саясат таануучу кечээ, 10-июнь күнү, каза тапты. Андан бир күн мурда УКМКнын тергөө абагынан эс-учун жоготуп, ооруканага комага түшкөн абалда жеткирилген. Адвокатынын айтымында, ал инсульт алып, мээсине кан куюлуп кеткен.
Улуттук коопсуздук мамлекеттик комитети Казакпаевдин өлүмү боюнча билдирүү таратып, 19-майдан 9-июнга чейин саясий серепчинин адвокаттары аны медициналык мекемелерге жаткыруу жөнүндө арыз менен кайрылбаганын белгиледи.
Ал эми Башкы прокуратура Казакпаевдин өлүмү боюнча текшерүү ишин баштаганы маалым болгон.
Казакпаевге мамлекетке чыккынчылык кылды деген айып тагылып, былтыр кармалган. Аны менен кошо Кыргызстандагы казак диаспорасын жетектеп келген Марат Токтоучиков колго түшүрүлгөн.
Марат Казакпаев буга чейин Кыргыз-Россия Славян университетинин эл аралык мамилелер факультетинде сабак берген. КР Улуттук илимдер академиясынын Экономика институтундагы эл аралык көйгөйлөр бөлүмүндө илимий кызматкер, "Полис Азия" аналитикалык борборунда адис болгон.