БИШКЕК, 10-июн. — Sputnik. Катарлык компания Бишкекте таштандыны кайра иштетүү жолу менен жер семирткич жана электр энергиясын алса болорун айтып, бул боюнча долбоорун сунуштаганын мэриянын маалымат кызматы кабарлады.
Билдирмеге караганда, калаа башчысы Эмилбек Абдыкадыров компания өкүлү менен жолуккан.
"Долбоорду тааныштыруу учурунда компания таштанды полигонунун аймагына таштандыны кайра иштеткен 30 чакан комплекс орнотууга даяр экени маалым болду. Кийин аны кайра иштетүүдөн электр энергиясы жана жер семирткич алынат", — деп айтылат маалыматта.
Мэр кызматташууга даяр экенин айтып, компания өкүлдөрүнөн долбоорду ишке ашыруудагы так сунуштарын сураган.